Па стану на 2016 год сетка дзяржаўных музеяў Мінскай вобласці налічвае 23 установы: 4 музеі абласнога падпарадкавання (ДУ «Мінскі абласны краязнаўчы музей», ДУ «Дзяржаўны мемарыяльны комплекс «Хатынь», ДУ «Барысаўскі аб'яднаны музей», ДУ «Івянецкі музей традыцыйнай культуры») і 19 раённых музеяў. Па профілю: 19 музеяў – комплексныя, 3 – гістарычныя і Гісторыка-культурны музей-запаведнік «Заслаўе». У Бярэзінскім, Смалявіцкім і Стаўбцоўскім раёнах ажыццяўляецца падрыхтоўчая работа па стварэнні раённых музеяў.

Вядзецца мэтанакіраваная праца па развіцці сеткі дзяржаўных музеяў, стварэнні (абнаўленні) пастаянных экспазіцый. За перыяд 2011-2014 гг. новыя пастаянныя экспазіцыі створаны ў Мінскім абласным краязнаўчым музеі, Барысаўскім аб'яднаным музеі, Дзяржаўным мемарыяльным комплексе «Хатынь», Копыльскім раённым краязнаўчым музеі, Нясвіжскім гісторыка-краязнаўчым музеі, Івянецкім музеі традыцыйнай культуры, Пухавіцкім раённым краязнаўчым музеі, Жодзінскім краязнаўчым музеі, Валожынскім раённым краязнаўчым музеі.

Акрамя таго, на тэрыторыі вобласці размяшчаюцца 2 музеі рэспубліканскага падпарадкавання (Нацыянальны гісторыка-культурны музей-запаведнік «Нясвіж» і Беларускі дзяржаўны музей народнай архітэктуры і побыту) і філіялы Нацыянальнага мастацкага музея Рэспублікі Беларусь (в. Раўбічы Мінскага раёна), Дзяржаўнага літаратурнага музея Янкі Купалы (Маладзечанскі і Лагойскі раёны), Дзяржаўнага літаратурна-мемарыяльнага музея Якуба Коласа (Стаўбцоўскі раён), Дзяржаўнага музея гісторыі беларускай літаратуры (Мінскі, Маладзечанскі і Копыльскі раёны). А таксама прыватныя музеі – ТАА «Музейны комплекс старажытных народных рамёстваў і тэхналогій «Дудуткі (в. Пціч Пухавіцкага раёна) і арт-галерэя «Янушкевічы» (аг. Ракаў Валожынскага раёна). У красавіку 2014 года адкрыты Музей гісторыі слуцкіх паясоў РУП «Слуцкія паясы» (г. Слуцк).